Tuesday, October 19, 2010

السحابة السودا .. كلاكيت سلبنتاشر مرة

وكالة ناسا لأبحاث الفضاء رصدت السحابة السودا في مصر و إتكلمت عنها و حذرت الناس منها ... لكن وزارة البيئة المصرية نفت تماما وجود أي سحابة سودا أو حتي خضرا أو حمرا في مصر
و أنا من هذا المزنق أعلن ثقتي التامة و ثقة الشعب المصري العمياء في كلام وزارة البيئة بإن من النهاردة مفيش سحابة .. أنا السحا .... معلش .. نسيت نفسي ودخلت على فيلم الجزيرة
:)))
ما علينا .. نرجع تاني و نقول إننا كلنا بنثق في كلام وزارة البيئة المصرية - لصاحبها و مديرها الدكتور ماجد جورج - و إن مفيش أي سحابة سودا ولا أي بطيخ من الكلام الفاضي ده و إن اللي حاصل في الجو ده هو نتيجة منخفض جوي حار جايلنا من دولة سفندق العرس و إن الدخان اللي هيعمي الشعب المصري ده نتيجة إحتفال بعض الفلاحين بأعياد الرز بطريقة عائلية و بما إن الفلاح من دول بيخلفله ستين عيل و بما إن نص مصر فلاحين فيبقى الدخان بتاع الإحتفال بعيد الرز هو اللي عامل الحكاية دي و إن دخان حرق قش الرز مفيد للبيئة و للشعب المصري كله علشان بيديله مناعة و مش مضر إطلاقا زي الإشاعة المنتشرة ما بتقول خصوصا بعدما ثبت تاريخيا - و جغرافيا بالمرة - إن عيد الرز ده عيد فرعوني قديم و إن رمسيس التاسع مات مخنوق من الشعب بعد ما الشعب رفض إنه يبطل يحتفل بعيد الرز
و بنقول للقلة المندسة الموجودة في ناسا : موتوا بغيظكم فنحن لن تنفع معنا هذه الحيل التي تهدف إلى زعزعة - حلوة زعزعة دي .. بتفكرني بالقصب :) - ثقة الشعب المصري كله في وزارة البيئة و تحضرني - في هذا المزنق الغويط - جملة قالها الفنان : خالد صالح في فيلم عمارة يعقوبيان عندما قال : الشعب كله ماسك في ديل الحكومة زي ما تكون أمه اللي خلفته
و المعني في قش رز الشاعر
أترككم الآن مع بعض صور الإحتفالات المهيبة بأعياد الرز في مصر

5 comments:

Marian said...

جميلة جدا بجد التدوينة دي يا سامح
و عجبتني حكاية الزعزعة دي
بجد أسلوبك سلس و جميل فعلا

Anonymous said...

الرز الليلة الليلة ليله عيدو
يارب تبارك تبارك و تزيدو
:)
مقال جميل أحييك عليه

قهوة بالفانيليا - شيماء علي said...

حلوة التدوينة دي يا سامح
أصلا قصة السحابة السوداء دي قتلت بحثاُ و كذباً
و طبعا احنا مش هنعرف أكتر من الحكومة !!
مش كدة ؟؟

Sam Sh said...

ماريان:
ربنا يخليكي .. ده من ذوقك :)
----------------
أنونيموس :
على رأيك .. مفروض نألف أغنية للرز هو كمان :)
----------------
شيماء :
أكيد طبعا ... الحكومة عارفة أحسن مننا كلنا
مرورك أسعدني جدا ... نورتيني بجد
:)

Anonymous said...

مفيش حد مهتم أصلا يا أستاذ سامح
الناس بقت معندهومش أمل في أي حاجة كأنهم شوية بهايم في زريبة مستنيين دورهم في الدبح