NEW START

إتنازلت كتير عن حقوقي .. بس مش هتنازل مطلقاً عن حقوقي مرة تانية
عملت حاجت كتير جداً علشان خاطر ناس كتير .. وجه وقت إن أنا أعمل حاجات كتير جداً علشان خاطر نفسي ..
طنشت حاجات كتير علشان ناس كتير .. كان فيه وخلص ..
من النهاردة هعمل اللي يريحني .. أصل كفاية تعب لحد كده و حرقة دم و ضغط جسدي و عصبي لحد ما جالي المرض .. أنا لي حقوق على نفسي برضه زي ما فيه ناس ليهم حقوق عليا ..
من النهاردة لو مش عاوز تسمعني .. مش مشكلة خالص .. نفض لنفسك و أنا كمان هنفضلك .. عادي يا معلم .. عيش حياتك و أنا هعيش حياتي .. كل واحد يعمل اللي يريحه ..
و بما إن اللي فاضل في العمر مش أد اللي راح - ودي حاجة أنا متأكد 100% منها - فأنا هعيش الشوية اللي فاضلينلي دول لهدف واحد بس: أريح نفسي على الآخر على حساب أي حد عاوز يحرق دمي
هو أنا كده .. عاجبك يا عم يبقى تمام .. مش عاجبك يبقى أنشف حيطة و تخبط دماغك فيها ..
محدش له أي حاجة عندي غير عيلتي و أهلي و أصحابي و الناس اللي خايفين بجد عليا .. غير كده في الجزمة ..
آسف لعيلتي لو الضغط العصبي خلاني إتعصبت عليكم في يوم من الأيام أو زعلتكم بأي شكل .. بتستحملوني كتير أنا عارف ...
آسف لأصحابي لو قصرت في حقكم يوم .. بجد كان غصب عني بس هحاول بكل جهدي إن ده ميتكررش تاني ..
آسف لكل حد خايف عليا و عاوز مصلحتي لو همشت رأيه في يوم من الأيام أو ما أخدتش بالي من كلامه و نصايحه .. من هنا و رايح هفكر كويس جداً في كل كلامكم و مش هطنشه تاني ..
وأكتر حد عاوز أتأسفله هو أنا ... بجد بتأسف لنفسي على اللي عملته فيها ده .. بس وعد و عهد إن ده مش هيتكرر تاني يا "أنا" ...
‪#‎NEW_START_2015‬

2015

كل سنة و إنتم طيبين 

مش عارف ليه مش مايل إن أنا أحتفل المرة دي بالسنة الجديدة ..

يمكن علشان حالتي الصحية الحالية و إصابتي بإنزلاق غضروفي و أنا لسة عندي يادوب 30 سنة

أو يمكن علشان حسيت إن أنا كبرت فجأة .. 

أو يمكن علشان حسيت إن 2014 والسنوات اللي قبلها كانوا فاضيين .. مجرد أرقام على نتيجة فاضية

مش عارف .. بقالي كام سنة كده مش عارف أفرح ..

مش لاقي إيجابيات .. أو يمكن مش عارف أشوف إيجابيات ..

بجد مش عارف ...

حتى كل سنة كنت دايماً أقول لربنا إن السنة الجديدة دي عاوزها تكون بتاعتك إنت يارب و تخليني أقرب منك أكتر .. وفي الآخر بلاقي إن أنا بعدت أكتر و أكتر عن كل حاجة حلوة ..

كرهت إن أنا أتوقع حاجة كويسة من كتر المشاكل اللي الواحد عمال يلبسها واحدة ورا التانية ...

مش عارف دي حالة إكتئاب .. ولا حالة رصد واقعي للدنيا بتاعتي ولا إيه بالظبط ..

بس اللي أنا حسيته قلته وخلاص ...

يا 2015 .. لمي نفسك و حاولي تظبطي الدنيا علشان أنا خلاص جبت آخري فعلاً

كل سنة و إنتم طيبين :)