Tuesday, August 10, 2010

كاد المعلم أن يكون ....

هو أكيد فيه جزء من كلام إبراهيم عيسى مظبوط عن إن المجتمع كله فيه إنحرافات مش في قطاع التعليم بس .. لكن أحمد زكي بدر هو وزير التعليم و علشان كده بيتكلم في اللي يخص وزارته و أكيد مالهوش ذنب في إن وزير الصحة - مثلا - مش بيطلع يتكلم عن إنحرافات الدكاترة في وزارته ولا بيطلع يعرف الناس هو عمل معاهم إيه ؟؟ فالراجل ماشي بمبدأ الشفافية بمعنى إن أي حاجة تهم الناس بتحصل في وزارته بيعلنها للناس - و هو ده بالمناسبة المطلب اللي إبراهيم عيسى كان بينادي بيه من زمان - ده غير إن المدرس يا عمنا مهم جدا و يمكن أهم من الدكتور و الصيدلي و المقاول و الظابط .. لأن - ببساطة - المدرس هو اللي بيطلع من تحت إيده كل الناس دول فلو المدرس كان محترم هيطلع نسبة كبيرة جدا من الناس دول محترمين و العكس صحيح .. أنا شخصيا مقتنع تماما بإن جزء كبير جدا من فشل المجتمع ككل سببه هو فشل المنظومة التعليمية تماما ... يبقى لما يجيلنا واحد زي أحمد زكي بدر وزير نشيط و بيطبق مبدأ الشفافية و بيحاول يعرف الناس إن فيه حد هيحاسبهم لو غلطوا مش مفروض ننتقده كل النقد ده !!!! ممكن يكون أسلوبه حاد شوية لكن بالتأكيد هو - في وجهة نظري - أحسن بكتير جدا من باقي الوزراء الصامتين اللي محدش عارف هما شغالين إزاى و لا بيعملوا إيه و كل يوم و التاني واحد فيهم يخترعلنا مصيبة زي قانون الضريبة الجديد بتاع وزير الجباية بطرس غالي
----
الخلاصة إننا شعب عجيب جدا مبيعجبهوش العجب !!! ولا الوزير اللي بيطبق مبدأ الثواب و العقاب نافع ولا الوزير اللي بيطبق مبدأ الشفافية نافع ولا الوزير اللي مطنش نافع ولا أي حد نافع ... طب يا عم إبراهين بدل ما تقعد تتكلم كلام على الفاضي بالشكل ده ما تقترح يا أخي على الوزير حلول للمشاكل بتاعة التعليم في مصر من خلال البرنامج بتاعك و بعدين شوف هو هيعمل إيه
----
رأيي الشخصي جدا هو إن أحمد زكي بدر بالتأكيد ليس أفضل شخصية تتولى منصب وزير التعليم في مصر و هذا أمر واضح و لكنه أفضل وزير تعليم وصل إلى كرسي وزارة التعليم إلى الآن و هو أحد الوزراء النشطين الذين يستحقون أن نقترح عليهم و أن نحاول توجيه نظرهم إلى وجهة نظرنا في حكومة لها ودن من طين و ودن من عجين

4 comments:

Anonymous said...

تسلم إيدك
كلامك تماااااااااااااام

Anonymous said...

هو أصلا إبراهيم عيسى بيحب يقول لآ لمجرد إنه يبقى مختلف و خلاص

Anonymous said...

إبراهيم عيسى ده دماغه تعباااااااااااانة و مش عاجبه العجب على رأيك

Sam Sh said...

الإختلاف في الرأي لا يفسد للود قضية يا جماعة