مجرد سؤال

تنبيه : الكلمات الآتية مجرد تساؤلات و تكهنات شخصية قد تخطئ و قد تصيب ....

هل المجلس العسكري مكانش عارف إن الدستورية العليا غير مختصة بنظر القوانين التي لم تصدر بعد ؟؟

بالتاكيد عارف 100%

طب هل قانون العزل السياسي هيتطبق على أحمد شفيق ؟؟

أكيد .. زيه زي غيره ..

طب ليه المجلس العسكري أصلا أرسل القانون للمحكمة الدستورية العليا من الأساس طالما هي مش مختصة ؟؟

الإجابة الوحيدة المنطقية في نظري هي إن المجلس العسكري كان عاوز يتأكد إن القانون غير دستوري و بالتالي بعته للمحكمة الدستورية العليا و بالتأكيد المجلس العسكري سأل أحد القضاة في الدستورية العليا عن دستورية القانون من عدمه و بالتأكيد إتأكد إن القانون مش دستوري ...

طب و إيه يعني الكلام ده كله ؟؟

أقولك .. 

طبقا للقانون فاللجنة العليا للإنتخابات هتحذف إسم شفيق من القوائم و هتصدر القوائم النهائية بدون إسم أحمد شفيق .. فأحمد شفيق أو أي حد تبعه يقدم طعن للدستورية العليا بعدم دستورية قانون العزل السياسي و أكيد هياخد حكم بعدم دستورية القانون ده .. فالنتيجة تكون إيه ؟؟؟

إن قوائم الإنتخابات في الحالة دي هتكون باطلة و إجراءات إستبعاد الناس اللي إنطبق عليهم قانون العزل تكون باطلة و بالتالي بطلان إجراءات الإنتخابات ككل و بالتالي إعادة الحكاية من الأول خالص و فتح باب الترشح من تاني و عمر سليمان هيدخل الإنتخابات هو و أحمد شفيق .. و بعدها بكام يوم أو قبلها بكام يوم المحكمة الدستورية العليا هتعلن بطلان و حل مجلس الشعب لأن هيئة مفوضي الدولة أفتت بعدم دستورية مجلس الشعب نتيجة لبطلان إجراءاته و بعتت القرار ده بالفعل للمحكمة الدستورية العليا مع توصية بسرعة الفصل في بطلان مجلس الشعب ...

يبقى النتيجة إيه في الآخر ؟؟

مجلس الشعب إتحل بحكم محكمة .. و كل اللي نفسه يترشح هيترشح و برضه بحكم محكمة ... و خلي بالكم إن أحكام الدستورية العليا واجبة التنفيذ فورا ....

كل ده ليه ؟؟

علشان معملناش الدستور أولا ... و علشان عندنا مجلس شعب مالوش في التشريع ولا في القوانين ...

إشربوا بقى .....

Sameh Shokry