متبعديش !

متبعديش ..

لما تبقي مش معايا...

كل شيء في الدنيا بيبقى مش كفاية...

كل قصة تتحكي قدامي تبدأ بالنهاية...

لما تبقي مش معايا...

باشعر إني زي مؤمن قام يصلي فجأة حس بإنه ناسي كل آية...

باشعر إني زي أعمى معدي شارع واتبلى بناس شدوا من إيده العصاية...

باشعر إني كلمة حلوة. إنما مطرودة من أجمل حكاية...

لما تبقي مش معايا...

الطرق تضحك علي أما أمشي فيها لوحدي وتبعتر خطايا...

بكرة بيسهيني وبدال ما ألحقه بيصبح ورايا...

لما تبقي مش معايا...

ليلي بيهددني إنه مش هايمشي. وعتمته تسرق نجومي من سمايا...

بس لما بتبقي جنبي. الحياة بترق. تصبح زي دمعة حب في عيون الصبايا...

وأنت جنبي. الكون بيصبح حضن واسع...

حضن فيه القسوة في عيون الطغاة خجلانة من دمع الضحايا...

أنت ضلة. يوما ما وشي من لهيب الشمس في الصيف يتلطش...

وأنت زمزم. يوم ما أحس بإن قلبي في يوم عطش...

سكتي خليها دايما سكتك...

ونسيني بنبض قلبك. سكنيني في ضحكتك...

أنتِ دعوة مستجابة لما يبقى كل ما في الكون خطايا...

بقلم الدكتور الشاعر / صلاح عبدالله