كلنا أكيد بنعاني الأيام دي من موضوع قطع الكهرباء بحجة تخفيف الأحمال و خصوصا إن فيه قضايا و حوادث بتحصل أثناء فترة إنقطاع الكهرباء زي حوادث النشل و السرقة اللي زادت و زي الحادثة الأخيرة بتاعة سرقة لوحة زهرة الخشخاش - أعتقد إن اللي سرقها عمل كده علشان المزاج .. إنتم عارفين بقى .. خشخاش و حشيش و كلام من ده يعني - ... المهم .... كنا بنقول إيه ؟؟؟
آه .. تخفيف الأحمال
هو أنا شايف بصراحة إن الحكومة نجحت في تخفيف أحمال الهدوم من على معظم الشعب المصري لأن الكهربا لما بتتقطع التكييفات و المراوح بتقف طبعا و بالتالي المواطن بيفرهد من الحر و بالتالي بيضطر إنه يخفف على أد ما يقدر و بالتالي تكون الحكومة نجحت في الموضوع ده
----------
نتكلم بجد شوية بقى
أنا ملاحظ حاجة مهمة جدا .. اللي هي إيه بقى ؟؟
لما التعليم باظ طلعت الحكومة قالت إن التعليم محتاج دعم و محتاج فلوس علشان يتحسن و يتطور و يكون مستواه مقارب - و ليس مساو - للدول المتقدمة و هنا ظهر مصطلح التعليم الخاص و بدأنا نشوف و نسمع عن الجامعات الخاصة اللي مصاريفها بالدولار .. و بعد كده لما الحكومة شافت إن مستشفيات وزارة الصحة بايظة و مش بتقدم خدمة كويسة للناس بدأنا نقول إن مشروع التأمين الصحي فاشل ولازم نشوفله حل و بالتالي بدأت الحكومة تفكر في خصخصة القطاع الصحي في مصر ... و قبلهم كان فيه هيئة المياه اللي بقت شركة قابضة ... تفتكروا اللي بيحصل في الكهرباء ده بداية لفكرة هتطرحها الحكومة لخصخصة شركة الكهربا في مصر أو على الأقل السماح لشركات خاصة بتقديم خدمة الإمداد بالتيار الكهربائي للمواطنين ؟؟
أو يمكن تكون بداية لإرتفاعات ضخمة في سعر الكهربا في مصر خصوصا بعد تصريحات أحد المسئولين بإن الحكومة بتصرف مليارات على الكهربا و إن الشعب لازم يتحمل التكلفة دي ؟؟؟
مش عارف ده ممكن يحصل ولا لأ ... بس معتقدش إن فيه حاجة بعيدة
أتمنى بجد إن أنا أكون غلطان في كلامي و مفيش حاجة من دي تحصل لأن الحكاية مش ناقصة أصلا
.gif)
8 comments:
لأ ان شاء الله مش هيحصل
!!!
ايه الحكومة الفاشلة دي
و الله ما عاد في حدا في مصر مهتم بأي إشي
الشعب كله جبان و متخاذل و غير مهتم
لكي الله يا مصر
عليا الطلاق كل الكلام اللى إنت قلته دا هيحصل بالنص و إبقى قابلني لو حد فى مصر كلها فتح بقه باى كلمة و الناس كلها هتدفع و الجزمة فوق دماغهم و دماغ اللى جايبينهم
خلاص البلد دى معدش فيها رجالة
اولا ميرسي ليك لانك مريت بمدونتي بس انا كنت مسافره ومالحقتش عرفتش ارد عليك او بمعني اصح ما كنتش بقدر ادخل النت واهتم بالي بيتبعوني
ثانيا رمضان كريم
ثالثا انا لسه جايه من الاردن والكويت واكتشفت ان عند
هم نفس المشكله تخيل بقي
يا عم إتكلم في أى موضوع في الهيافة هتلاقي مليون تعليق عندك إنما هتتكلم في البلد و أحوالها و كلام كبير من ده مش هتلاقي حد يعلق
البلد دى خلاااااااااااص خرببببببت يا أستاذنا و إنت و الى زيك بيدنوا فى مالطة و اللى ماشى الأيام دي هو الهلس و التهييس
هيس تعيش يا عمنا
ياااااااااااااااه
هو لسة فيه حد بيتكلم عن مصر و اللي بيحصل في مصر ؟
لسة فيه حد عاوز يصلح و محموق على مصر و اللي مصر ؟؟
دا إنت اللي زيك إنقرضوا
مقصدش أهينك و الله العظيم بس الناس اللي لسة عندهم وطنية و عندهم دم بقوا قليلين أوي و حضرتك واحد منهم
نفسي أتعرف على حضرتك جدا
واحدة مصرية
شف بقى انا متأكد ان دة هيحصل علشان مصر بقت كده
يخرب بيتهم
تحياتى
ربنا معاك دايما
(:
للأسف مصر بتتدمر
واجب اختياري لو مكنتوش حلتوه وأنا غيرت فيه سؤال
لمعرفة إطلاعتكم فلو عايزين تحلو خير وبركه ، ولو مش عايزين متقلقوش الواجب مش هيتحط في أعمال السنة .
ما هي كتب الطفولة التي بقيت عالقة في ذاكرتك؟
مَنْ أهم الكتاب الذين قرأتَ لهم ؟
من هم الكتاب الذين قررت ألا تقرأ لهم مجددا؟
في صحراء قاحلة ، أي الكتب تحمل معك؟
ما هو الكاتب الذي لم تقرأ له أبدا ، وتتمنى قراءة كتبه ؟
ما هي قائمة كتبك المفضلة ؟
ما هي الكتب التي تقرؤها الآن ؟
اللي بعت الدعوه ؟
أرسل الدعوة لمدون واحد علي الأقل من أجل مشاركتنا باطلاعهم في القراءة ؟
Post a Comment