حياتك .. قرارك ...

طظ في أي حد عاوز يشيلك فشله و يلبسك مسئولية غباؤه وقراراته اللي لبسته في حيطة ..
متحاولش تبرر لأي حد .. طظ أصلا في أي حد ..
عمرك شوفت واحد بيحاول يقنع الجاموسة إن المانجه مثلا طعمها أحسن من البرسيم ؟!
مش مفروض يهمك رأي أي حمار فيك .. ماهو حمار .. رأيه هيهمك ليه ؟!!
ولو الناس إتكلمت من وراك .. عادي .. ما هما أصلا وراك وإنت طول عمرك قدامهم .. إيه الجديد يعني ؟!!
#كبر_مخك و #عيش_دنيتك كأحسن ما يكون .. حياتك هي قرارك الفردي .. متخليش بقر يتحكموا فيها ..
دماغك بتاعتك لوحدك .. مش شركة بينك و بين أي حد أيا كان !
بطل تعمل لأي حد أي إعتبار .. إجمد كده و متبقاش طري .. أصل محدش هيشيل الطين غيرك لوحدك .. حتى اللي شاركك في قرارك و شجعك عليه مش هيشيل نتايج قراراتك معاك .. فوت في الحديد .. وإنحت في الصخر .. إعمل لنفسك مكان في العالم .. وهتلاقي كل اللي كانوا ضدك في يوم بيسقفولك .. هيسقفولك وهما مقهورين بس مش مهم .. المهم إنهم هيسقفولك ..
كل واحد تعبك و حاربك هيتمحك فيك .. هتلاقيه بيقول إنه أول واحد ساعدك و أول واحد توقعلك مستقبل كبير .. وهو في الحقيقة اول واحد تعبك .. و أول واحد وقف في طريقك و أول واحد قال عنك إنك هتفشل ..
إعرف وإفهم إنك لو عملت اللي بتحبه هتنجح .. ولو عملت اللي مش بتحبه عمر ما نجاحك هيبقاله طعم ...
عيش حياتك إنت .. فكر براسك إنت مش راس الناس ..
دي حياتك .. وده قرارك .......