زمان غنى عبد الوهاب للنيل و قاله : يا حلو يا أسمر ..
و زمااااااااااااااااااااااااااااااان أوى الفراعنة قدسوا النيل و عملوله أعياد لدرجة إنهم عملوه إله من آلهتهم و سموه الإله حابي
و النهاردة برضه المصريين كلهم بيقدروا النيل جدا .. فمنهم ناس بتصطاد فيه - و ده غير الصيد في المية العكرة علشان محدش يفهمني غلط - و فيه ناس معتبراه مقلب الزبالة العمومي بتاع مصر و أى حاجة مالهاش لازمة يرموها فيه و أى حيوان ميت يرموه فيه - أمال هيودوه فين يعني ؟؟؟ - و فيه ناس بيعتبروه دورة المياه العمومية الكبيرة - يموتوا نفسهم يعني ؟؟ حاجة غريبة و الله - عموما ده معناه في كل الأحوال إن النيل مهم عند المصريين حتى لو إختلفت طريقة الإستفادة بيه و حتى لو إتحول من الإله حابي و من الحلو الأسمر لمصرف عام
دي مقدمة كان لازم أقولها علشان أبين مدى أهمية النيل عند المصريين على مر التاريخ
الأيام دي بقى فيه مشكلة كبيرة على حكاية النيل و نصيب كل دولة في الميه بتاعته .. أيوة .. نصيب كل دولة .. مالك إزبهليت كده ليه ؟؟؟
ماهو أصل النيل مش بتاع مصر لوحدها .. معظمنا عارفين الحكاية دي .. فيه دول تانية بتشترك معانا في ملكية مياه النيل و منهم دول بتعترض تماما على نصيب مصر من مياه النيل اللي هو 55.5 مليار متر مكعب مياه في السنة .. و ده حوالي 87% من منسوب مياه النيل .. يعني مصر لوحدها بتاخد 87% من النيل كل باقي الدول بتاخد 13% بيتوزعوا عليهم حسب إتفاقيات مبرمة بينهم ... الأيام دي اثيوبيا وست دول تانية من شرق ووسط افريقيا، هي بوروندي وجمهورية الكونغو الديموقراطية وكينيا ورواندا وتنزانيا وأوغندا هيوقعوا إتفاقية جديدة في 14 مايو علشان التوزيع العادل لمياه النيل لأن الدول دي شايفة إن مصر متستحقش الكمية دي كلها خصوصا إن فيه تقاريرمصرية رسمية بتقول إن مصر بتهدر أكتر من 80% من نصيبها في مياه النيل .. طبعا الموضوع مسبب قلق كبير أوي .. و مصر رفضت أي تعديل في أي إتفاقية تمس حصتها من مياه النيل بأي شكل و الحكومة قالت على لسان وزير الموارد المائية والري محمد نصر الدين علام إن "مصر تحتفظ بحقها فى اتخاذ ما تراه مناسبا لحماية مصالحها القومية". و ده طبعا من حقنا .. و من حق الحكومة إنها تقلق جدا جدا من الموضوع ده .. ماهو تخيل كده لو الموضوع ده حصل هيكون إيه الموقف ؟؟
تخيل لو مقلب الزبالة العمومي في بلدكم إتقفل و مبقاش عندك مكا ترمي الزبالة فيه
تخيل لو فيه 100 مصنع المصرف المشترك بتاعم إتقفل هيعملوا إيه ؟؟
و الأنيل من كده تخيل لو دورة المياه العمومية إتقفلت و الناس مبقتش عارفة تعمل زى الناس ما بيعملوا !!!
طبعا الحكومة ساعتها هتكون مطالبة بإنها تقدم الحل لكل المشاكل دي .. و ساعتها هنحتاج موارد تانية علشان نحل المشاكل دي .. و ساعتها الحكومة هتفرض ضرائب جديدة علشان تدبر الموارد دي .. و ساعتها المصايب كلها هتيجي على دماغنا إحنا - الشعب يعني - ... عرفتم بقى إن الموضع كبير ؟؟
آه .. نسيت أقولكم إن الحكومة أيام محمد إبراهيم سليمان وزير الإسكان السابق كانت بدأت بالفعل عمليات ردم لأجزاء من النيل علشان تعمل طرق و كازينوهات و مطاعم سياحية .. أكيد كانوا عارفين إنهم هيضطروا يدبروا فلوس يظبطوا بيها الدنيا لما الخناقة على مياه النيل تحصل .. أمال إنتم فاكرين إيه ؟؟
أسيبكم بقى مع بعض مظاهر تعظيم و تقدير و إحترام المصريين للنيل .... و يجعله عاااااااااااااااامر
